L Grop de Folclor Cianacei

L Grop de Folclor Cianacei l’é stat metù sù per se trèr ite, durèr e moscèr con gust e orgolie l guant, i bai e la mùseghes de Fascia de chisc egn passé.

Fascia l’é chela val de la Dolomites tel Trentin che se enconeea anter la provinzies de Busan e Belun, s_iavezèda fora da èghes de la Veisc. Cianacei, japede l Saslonch e la Marmolèda, l’é l paìsc più aut de la val.

Sia jent la é ladina, la vif da anorum te chesta valèdes dintornvìa l grop del Sela e la rejona n lengaz veior che vegn dal latin, che n’à ite del todesch e del franzous: l Ladin.

L’é semper stat na val pureta, ma ampò, dant che rue ence cassù l turism a mudèr l’economìa, la usanzes e la tradizions les era n muie vives, con reisc fones te la sozietà, enceben che ades magari no se ge recognosc l valor che les merita.

Da chest pont de veduda l Grop de Folclor Cianacei, apede a etres gropes de folclor l chier de ge passèr inant sia gaissa ai jogn che i pel coscita portèr inant i valores de nesc giaves.

L Grop de Folclor Cianacei se l veit te la manifestazions e ti evenc de folclor sibie te la Tèlia che foradecà, a portèr stroz n repertorie de bai e mùsega ladines tradizionèles.